Сэтгүүлч Б.Дэжид

Монгол Улсаас БНХАУ-ын Бээжин хотод суугаа ЭСЯ-ны консулын газрын ажилтнууд Монгол улсад нэвтрэх визийг дамлан худалддаг тухай яриа байдаг.

Гэтэл энэ хэргийн гардан гүйцэтгэгч, зохион байгуулагчаар УИХ-ын гишүүн асан А.Мурат ажилладаг байсан мэдээллийг иргэд хууль хяналтын байгууллагад мэдээлжээ.

А.Мурат нь 2014 оны зургадугаар сард Монгол Улсаас Эрээн хотод суух консулаар томилогдсон даруйдаа манай улсад нэвтрэх визийг дамлан худалдах, хууль бусаар их хэмжээний орлого олох ажлыг зохион байгуулах болсон байна. Тэрбээр өөрийн эхнэр С.Кулзада хүргэн дүү С.Сапарбек нарыг виз олгох ажилд томилсон байдаг.

Иргэдийн гомдлын дагуу А.Муратыг хууль хяналтын байгууллагаас шалгахад виз дамлах ажлыг эхнэрийн хамт хийж байсан. Үйлдэл дээрээ баригдсан тэрбээр шалгалтын явцад захиа үлдээгээд эхнэр С.Кулзада хүргэн дүү С.Сапарбек нарыг дагуулан Казахстан руу зугтаасан билээ.

Тэгвэл түүнийг онц ноцтой гэмт хэрэгт холбогдсон гэж эх сурвалжууд мэдээллээ. Чухам ямар хэрэгт холбогдсон нь тодорхойгүй байна. Энэ талаар бид тун удахгүй мэдээллэх болно.

Дашрамд дуулгахад А.Муратын хувьд 2016 оны сонгуульд Баян-Өлгий аймгаас бие дааж нэр дэвшихээр төлөвлөж байжээ.

gereg.mn