Сүүлийн үед нүүрсний борлуулалт унасан, хил гарахгүй байгаа асуудлаар олон нийтийн дунд эргэлзээ үүсээд буй. Нүүрсний борлуулалт манай гол худалдан авагч БНХАУ-ын талд ямар нөхцөл байдал үүссэн талаар "Эрдэнэс Тавантолгой" ХК-ийн Борлуулалт, маркетинг, тээврийн газрын дарга О.Цэрэндондогийн "Тэнгэр" телевизийн ярилцлагаас онцлон хүргэж байна. 

-БНХАУ-ын эдийн засгийн гол тулгуур болох үл хөдлөх хөрөнгийн зах зээл унасантай холбоотойгоор барилгын салбарын эрэлт хэрэгцээ буурч, ган төмөрлөг болон цементийн хэрэглээ агшсан, улмаар гангийн үйлдвэрлэл, түүнийг дагасан коксын үйлдвэрүүд алдагдалтай ажиллах болсон. Тиймээс БНХАУ гангийн үйлдвэрлэлээ 10 хувиар бууруулахаар болсноо зарлаад байгаа.

-Ган төмөрлөгт ашигладаг коксжих нүүрс, барилгын материалд ашигладаг эрчим хүчний нүүрсний эрэлт хэрэгцээ буурсан. Үйлдвэрлэлд нүүрсний эрэлт буураад эхлэхээр БНХАУ-ын нүүрс үйлдвэрлэгч Монгол Улстай ойр мужууд төлөвлөгөө биелүүлэхийн тулд үйлдвэрлэлээ нэмэгдүүлэх болсон. Энэ нь мөн эрэлт нэмэгдүүлэхэд нөлөөлж байна.

-Манай нүүрс баяжуулах үйлдвэр 2024 онд ашиглалтад орсон. Үйлдвэрийн гол онцлог бол чанартай бүтээгдэхүүн үйлдвэрлэх. БНХАУ-ын зах зээлийн хувьд баяжуулсан нүүрсний эрэлт их байна. Тиймээс бид 2025 онд таван сая тонн түүхий нүүрсийг баяжуулж, гурван сая тонн баяжуулсан нүүрс борлуулах төлөвлөгөө гаргасан.