“Оюутолгой” компанийн Төлөөлөн удирдах зөвлөл өчигдөр хуралдаж, төслийн шинэчилсэн ТЭЗҮ-ийг ирэх мягмар гаригт дахин хэлэлцэхээр шийдвэрлэжээ. Санхүүжилтийн асуудлаар нэмэлт тодруулга авах шаардлагатай болсон тул хурлыг ийнхүү хойшлуулсан тухай эх сурвалж мэдээллээ.

Шинэчилсэн ТЭЗҮ-ээр далд уурхайд шаардлагатай санхүүжилт анх тооцоолсноос 300 сая ам.доллараар өсч, 4.9 тэрбум ам.доллар болсон гэх мэдээллийг албан тушаалтнууд өгч байгаа. Өнөөдрийг хүртэл зарцуулсан 500 сая ам.долларыг нэмж тооцвол нийт дүн нь 5.4 тэрбум ам.доллараар хэмжигдэж байгаа юм.

Шинэчлэн боловсруулсан ТЭЗҮ-ийн тайланг “Turquoise Hill Resources” компани өнгөрсөн сарын 22-нд “Оюутолгой” компанийн ТУЗ-д хүлээлгэн өгсөн бөгөөд баталсан тохиолдолд Монгол Улсын Эрдэс баялгийн мэргэжлийн зөвлөлөөр хэлэлцүүлж, батлуулах учиртай.