Сэтгүүлч Н.Уранхолбоо

   Зам, тээврийн хөгжлийн сайд Д.Ганбат өнгөрсөн долоо хоногт Улаанбаатар-Хөшигийн хөндийн олон улсын шинэ нисэх онгоцны буудал чиглэлийн хурдны авто замын ажилтай танилцжээ. Тэрбээр зам, барилгын ажлыг эрчимжүүлж, батлагдсан график төлөвлөгөө, стандартын дагуу үйл ажиллагаагаа эрчимжүүлэх үүрэг өгсөн байна.

Тус 32,2 км хурдны авто зам нь 32,5 метр зорчих хэсгийн өргөнтэй, хоёр урсгал зургаан эгнээтэйгээр баригдаж байгаа аж. Зорчих хэсэг нь зааглагдсан тус бүр нь гурван зорчих зурвастай байхаар төлөвлөж, барилгын ажил батлагдсан графикийн дагуу нийт 44.1% -ийн гүйцэтгэлтэй үргэлжилж буй юм. 

Барилгын ажлын талбайд одоогоор нийт 667 хүн ажиллаж байгаа бөгөөд үүнээс 420 монгол, 204 хятад ажилчид буй талаар албаныхан мэдээллээ. Мөн нийт 249 ширхэг техник, тоног төхөөрөмжөөс гадна 500 тн/цаг хүчин чадалтай асфальт бетон завод, хоёр иж бүрдэл хээрийн лаборатори ажиллуулж, стандартын дагуу автозамын барилгын ажлыг гүйцэтгэж байгаа талаар төсөл хэрэгжүүлэх нэгжээс онцлов.

Барилгын ажлын Ерөнхий гүйцэтгэгчээр БНХАУ-ын Төмөр замын “Дөрөвдүгээр товчоо” групп, туслан гүйцэтгэгчээр “Бадрах Ойл” ХХК, “Эрдэнэ зам” ХХК, “Арж Капитал” ХХК тус тус ажиллаж байгаа аж.